AGINDUA, 2011ko uztailaren 27koa (pdf, 249 KB), Etxebizitza, Herri Lan eta Garraioetako sailburuarena, Euskal Autonomia Erkidegoko bizitegi-eraikuntzaren sektoreko enpresetan kalitatea kudeatzeko sistemak ezarri eta hobetzea sustatzeko, iraunkortasuna bultzatzeko eta berrikuntza indartzeko laguntzak iragarri eta arautzen dituena (Eraikal Hamairu programa).

Laguntzen onuradunak:

Euskal Autonomia Erkidegoan kokatutako eragileek aukera izango dute Agindu honetan ezarritako laguntzak eskuratzeko, baldin eta kudeaketako eta etengabeko hobekuntzako sistemak ezartzeko sustapenaren ardura hartzen badute Euskal Autonomia Erkidegoan ere kokatutako bizitegi-eraikuntzaren sektoreko enpresetan.

Honako hiru eragile mota hauek har daitezke kontuan:

• Bizitegi-eraikuntzaren sektoreko enpresa traktoreak, baldin eta, beren erosteko eta kontratatzeko almena dela-eta, hornitzaile eta kontratistengan eragiteko eta haien buru gisa jarduteko ahalmena badute.
• Ordezkaritza zabala duten edo jendea biltzeko ahalmen handia duten bizitegi-eraikuntzaren sektoreko enpresen talde edo elkarteak.
• Bizitegi-eraikuntzaren enpresako hainbat enpresari kudeaketa-sistemak ezartzeko beharrezko euskarria ematen dieten bestelako eragileak. Honako hauek joko dira halakotzat: bizitegi-eraikuntzaren sektoreari lotutako lanbide-elkargoak, ikerketa teknologikoko zentroak, Merkataritza Ganberak eta abar.

Diru kopurua:

Xede horretarako 1.350.000 euro bideratuko dira guztira, honela xehatuak: 135.000 euro 2011ko ekitaldirako, 675.000 euro 2012ko ekitaldirako eta 540.000 euro 2013ko ekitaldirako.

Erantsi beharreko agiriak:

Agindu honetan araututako laguntzak eskuratzeko eskaera Agindu honen I. eranskinean bildutako ereduaren arabera egin beharko da.

Agindu honetan arauturiko laguntzak eskuratzeko eskaerarekin batera, honako dokumentazio hau aurkeztu beharko da:

• Hainbat urtetarako proiektuaren memoria (gehienez 3 urteko proiekzioa egingo da, 2013ra arte)
• Ordaindu beharreko zergak, gizarte-segurantzakoak barne, egunean dituela erakusteko egiaztagiria.
• Identifikazio fiskaleko txartelaren fotokopia.
• Eskabidea egin behar duen pertsonaren ahalordetzaren kopia.

Ingeniaritza-estudioek ingeniarien elkargoko ziurtagiria edo frogagiria aurkeztu beharko dute, dena delako estudioak bizitegi-eraikuntzako lanak egin dituela egiaztatzen duena.

• Proposamena aurkezterakoan, proiektuak bestelako diru-laguntza osagarriak baldin baditu, erakunde onuradunak proposamenean aitortu beharko du, diru-laguntzaren zenbatekoa eta tipologia zehaztuz, II. eranskinean adierazitako ereduaren arabera.
• Konpromisoak egitea. Proiektuan parte hartuko duten enpresek honako konpromiso hauek bete beharko dituzte, III. eranskinean adierazitako ereduaren arabera.
• Emakume eta Gizonen Berdintasunerako Legea betetzeko konpromisoa, eta zinpeko deklarazioa, honako hauek guztiak egiaztatzeko: pertsona edo entitate eskatzailea ez dela administrazio-zigorra edo zigor penala betetzen ari sexu-diskriminazioa egin izanagatik; debeku hori jaso ez izana, Emakume eta Gizonen Berdintasunerako 4/2005 Legearen arabera; diru-laguntzak edo laguntza publikoak lortzeko aukera galdu ez izana; eta hori galaraziko lioketen lege-debekuen eraginpean ez egotea.

Aurrez aipatutako konpromisoa eta zinpeko deklarazioa IV. eranskinean adierazitako ereduaren arabera beteko dira.

Eskabideak aurkezteko epea:

Eskabideak aurkezteko epea hilabetekoa izango da, agindu hau Euskal Herriko Agintaritzaren Aldizkarian argitaratzen den egunaren biharamunetik aurrera.

Eskabideak aurkezteko lekua:

Laguntza-eskaera, eskatutako dokumentazioarekin batera, Etxebizitza, Berrikuntza eta Kontrol zuzendariari igorriko zaizkio, eta Etxebizitza, Herri Lan eta Garraio Sailaren Erregistro Orokorrean aurkeztuko dira (Donostia kalea, 1. zk., 01010 Vitoria-Gasteiz), edo sail horren Lurralde Ordezkaritzetako Erregistro Orokorretan, edo Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legean aurreikusitako bitartekoak baliatuz.